ភ្នំពេញ÷ នាយករដ្ឋមន្ត្រីកម្ពុជាសម្ដេចតេជោ ហ៊ុន សែន បានលើកឡើងថា ការឃាត់របស់អាជ្ញាកណ្ដាលលើការប្រកួតរវាងកីឡាករកម្ពុជា លោក​ ឈឿង ល្វៃ និងកីឡាករថៃ លោក សាមី បានចាមេក គឺមិនខុសនោះទេ ដោយសម្តេចលើកឡើងថា ការគិតដល់អាយុជីវិតកីឡាករជារឿងសំខាន់។

ក្នុងសារសំឡេងពិសេសរបស់សម្ដេចតេជោនាយប់ថ្ងៃទី១៦ ខែមេសា ឆ្នាំ២០២៣ សម្ដេចតេជោលើកឡើងថា៖ «ខ្ញុំយល់ស្របជាមួយនឹងការបកស្រាយរបស់អាជ្ញាកណ្ដាល! យើងមិនអាចគិតតែពីឈ្នះ ដោយមិនគិតពីអាយុជីវិតគេនោះទេ!»។

ការលើកឡើងរបស់សម្ដេចតេជោនៅពេលនេះគឺក្នុងពេលដែលមានការប្រតិកម្មជាច្រើនទាក់ទងជាមួយនឹងអាជ្ញាកណ្ដាលនៃការប្រកួតកីឡាប្រដាល់មិត្តភាពកម្ពុជាថៃរវាងកីឡាករកម្ពុជា លោក ឈឿង ល្វៃ និងកីឡាករថៃ លោក សាមី បានចាមេក ដោយមានការចោទប្រកាន់ថា អាជ្ញាកណ្ដាលមានការលំអៀងទៅលើកីឡាករថៃ។

ជាមួយគ្នានេះសម្ដេចតេជោក៏បានលើកឡើងថា កីឡាករដែលត្រៀមសម្រាប់ស៊ីហ្គេមមិនគួរណាត្រូវឲ្យឡើងមកវ៉ៃនៅលើសង្វៀនទេនៅពេលនេះ ត្រូវត្រៀមសម្រាប់ស៊ីហ្គេមតែម្ដង៕